حبيت أبدأ الجزء التاني من مقالي بصورة للكأس، بعد فوز الأهلي، وبنقول مبروك للأهلي مرة تانية
نرجع لموضوعنا بخصوص الإعلام الأهلاوي. كلنا اتفاجئنا بعد الماتش بالإعلام الأحمر، بينشر على الملأ إن الأهلي خد اللقب 3 مرات، وإنه بكده احتفظ بالكأس. وده كله كدب في كدب. الأهلي خد كأس السوبر 3 مرات. لكنه ماحتفظش بالكاس. بقول لواحد أهلاوي صاحبي عالحكاية دي. قام قايللي، هوة مين قال كده؟ مين قال إننا احتفظنا بالكاس. أرد عليه وأقوله، الكلام ده قاله “العامري فاروق” عضو مجلس إدارة النادي الأحمر في برنامج “شوبير اليوم” ونفس الكلام قاله “أحمد شوبير”، ده غير كتيبة الإعلاميين الحمر، اللي قالوا الكلام ده في الصحف المصرية تاني يوم. وخصوصاً في جريدة الأهرام، اللي بقت حمرا أوي. وحكاية حمار الأهرام دي موضوع تاني، هنبقى نتكلم فيه بعدين. ونفس الحكاية في المواقع الأهلاوية على الإنترنت. كله قال إن الأهلي احتفظ بالكأس. دي لينك جبتها بصعوبة من موقع جماهير النادي الأهلي
http://www.el-ahly.com/Sitemanager/templates/news.aspx?articleid=4740&zoneid=26
واللي يفتح الموضوع هيلاقيهم كاتبين : “لقد أثبت أبطال الأهلي اليوم .. أنهم أسياد كرة القدم الأفريقية .. فهو البطل .. وبطل كأس السوبر .. الذي فاز بها للمرة الثالثة في تاريخه .. وبهذا يكون له الحق بالإحتفاظ بالكأس للأبد .. إذا فاز بالكأس مرة أخرى .. وبهذا يكون الأهلي عادل الرقم الوحيد .. الذي كان الزمالك .. الوصيف الأزلي للأهلي .. بتفوق به على بطل الأبطال
وهقوللكو ليه جبت اللينك دي بصعوبة. علشان أول لما الحقيقة ظهرت، والناس عرفت إن لوائح البطولة بتقول إن الأهلي مينطبقش عليه شروط الاحتفاظ بالكأس، على طول كل الإعلام الأحمر والمواقع الأهلاوية لحسوا كلامهم. وحاولوا يغطوا عليه بأخبار تانية، عشان ميتكشفش كدبهم. نفس الحكاية في الصحف المصرية اللي بقت معظمها حمرا. مفيش حد فكر مجرد تفكير إنه يعتذر عن الكلام الغير دقيق، والبطولة المزيفة اللي كانوا عايزين يضيفوها لسجل طويل عريض من البطولات المزيفة. طيب اعتذروا وقولوا معلش إحنا غلطنا. لأ شوف البجاحة كمان، بيقولوا إحنا مقلناش كده، إنتوا جبتوا الكلام ده منين، وإحنا مقلناش كده. يا عالم اتقوا ربنا
ودي لينكات تانية من موقع يلا كورة، اللي بيحاول إنه يبقى محايد، وإن كان الحمار -فتحه عالحاء -بتاعه باين قوي
http://www.yallakora.com/arabic/news/details.aspx?ID=15139
http://www.yallakora.com/arabic/news/details.aspx?ID=15138
هتلاقيهم كاتبين إن الأهلي احتفظ بكأس السوبر. وطبعا لما بانت الحقيقة محدش فكر يقول إنه غلطان
دلوقتي هقولكو على شرط الاحتفاظ بكأس السوبر. “سابق احتفاظ الزمالك بكأس هذه البطولة لفوزه بها ثلاث مرات آخرها عام 2003 ، حرم الأهلي من معادلة ذلك، وإن عادل عدد مرات الفوز الزملكاوية، لكنه يحتاج إلى فوز رابع لكي يحتفظ بالكأس الجديدة لأنه لم يفز بها سوى مرتين، بينما المرة الثالثة كانت خاصة بالكأس التي استقرت في ميت عقبة“. يعني بعد لما الكاس ياخدها نادي معين، لازم الفرقة التانية تاخد الكاس 3 مرات عشان تحتفظ بيه. الكاس الأولانية احتفظ بيها الزمالك. والمطلوب من الأهلي إنه ياخد الكأس 3 مرات بعد احتفاظ الزمالك بالكأس. ولحد دلوقتي الأهلي خدها مرتين سنة 2006 و 2007، والمرة بتاعة 2002 متتحسبش ضمن العدد المطلوب، لأن الزمالك خد البطولة اللي بعدها في 2003 واحتفظ بالكأس. يعني نبدأ نعد من جديد من بعد 2003. وده حسب تصريحات الإتحاد الأفريقي لكرة القدم الكاف
الزمالك فاز بالكأس 3 مرات أعوام 1994 و 1997 و 2003. ومن ضمنهم سنة 1994 بالفوز على الأهلي 1 – 0 وكان حارس مرمى الأهلي وقتها أحمد شوبير. الأهلي بقى فاز بيها 3 مرات برضو أعوام 2002 و 2006 و 2007. والملاحظة إن من ال 3 مرات دولا، مرتين كان الفوز عن طريق ضربات الجزاء. ونرجع نقول، الأهلي محتفظش بالكأس
النقطة الأخيرة في الموضوع ده، موضوع تحطيم الأهلي لرقم الزمالك القياسي في الفوز ببطولة السوبر. وده مش صحيح. كل اللي عمله الاهلي بعد الفوز الأخير هوة معادلة رقم الزمالك في الفوز. التحطيم معناه إنه يتخطى عدد مرات فوز الزمالك بالكأس. وطبعا كل الإعلام الأحمر، لا بيسمع ولا بيشوف، ومقفلين دماغهم على إن الاهلي حطم. تحطيم إيه وتكسير إيه
با أهلاوية، ده ولا تعصب ولا حاجة. ده لقب وإنتوا بتحاولوا تسرقوه مننا. لأن واحد من اللي بيكتبوا في الأهرام كان معترض على اعتراض الزمالك، وشايف إن ده تعصب. هوة الواحد لما يدافع عن حقه يبقى متعصب. بخصوص موضوع الاحتفاظ بالكأس، نفسي أعرف الإعلام الأهلاوي، وأعضاء مجلس الإدارة اللي قالوا المعلومة الغلط دي. يا ترى ده تضليل للرأي العام، ولا جهل بقوانين الكاف. الاتنين أسوأ من بعض
وأخيراً. مبروك عليكم الكأس. بس ياريت متقولوش كلام مش صح، وتضيفوا بطولة وهمية مش من حقكو
وأحب أقول: الكلام ده كله مش للأهلوية. وإحنا والله العظيم فرحانين ليكو. الكلام ده للإعلام الأحمر اللي إداكو معلومة غلط. الإعلام اللي غاوي تطبيل وتزمير للأهلي عالفاضي والمليان. ولما يغلط ميفكرش مجرد تفكير إنه ويعتذر. ومبروك الكأس مرة تالتة. انتهى
