مدونة دواير

بالصور. حادثة عربية، وإسعافنا العظيم


على طريق بورسعيد الإسماعيلية، وقبل كوبري السلام ب3 كيلو حصلت الحادثة. كنت أنا وصاحبي راكبين العربية ولمحنا عربية ملاكي عاملة حادثة عالناحية التانية من الطريق. وأوتوبيس شرق الدلتا واقف على بعد منهم ونازلين منو ناس. الحادثة حصلت وكان أول من خد باله منها هوة سواق الأوتوبيس وبعدين إحنا. نزلنا من العربية عشان نستكشف الموضوع. للوهلة الأولي كان كل الركاب لسه عايشين وكمان إصاباتهم مش خطيرة. بس المشكلة إنهم محشورين جوة العربية ومش عارفين يطلعو. مسألنهمش عن تفاصيل الحادثة وسببها، لإن مفيش أولوية وقتها غير إننا ننقذهم ونطلعهم. بس اللي حصل غالباً. إن العربية خرجت عن الطريق واتقلبت، وخبطت في عمود كهربا ضغط عالي. بعد شوية جت عربية نص نقل وربطنا بيها العربية بتاعت الحادثة وشديناها بعيد عن العمود عشان نعرف نطلعهم من غير منتكهرب. بعدناها عن العمود وابتدينا نطلع الناس

الإتنين اللي ورا كانت حالتهم كويسة. شوية إصابات في الوجه، وإحتمال ارتجاج خفيف في المخ. لكنهم كانوا قادرين يمشوا لما طلعناهم. قلبة العربية كزا مرة كانت سبب إن الابواب تتطبق ومتفتحش. وبعد شوية جهد وتفكير، عرفنا نفتح الابواب اللي ورا وطلعنا الإتنين ونيمناهم على الرمل برا الطريق عشان ياخدوا نفسهم، ونعرف نكمل مع الباقيين. التالت اللي كان جمب السواق خد مننا وقت وكانت حالتو أصعب لأن وشو خابط في الإزاز. وفيه مشكلة في رجليه خلتو مش قادر يمشي واضطرينا نشيلو، عشان نحطه جمب زمايلو. ومع مرور الوقت الناس كانت بتتلم وعددها بيكتر، والعربيات اللي معدية تقف. بالتالي بدأنا نفقد تركيزنا عشان نطلع السواق. والناس كلها بتحاول تتدخل عشان تطلعو. وعند النقطة دي قررنا ننسحب. خصوصاً مع محاولاتنا الكتيرة عشان نطلعو واللي فشلت. لإن السواق كان رجليه محشورة تحت. والتابلوه نازل عليهم. والحل الوحيد عشان نطلعو ان التابلوه يتفك. ومفيش عندنا الأدوات اللازمة

طبعاً قبل لما نبدأ خالص اتصلت بالإسعاف، وبعدها ابتدينا شغل. الإسعاف وصل والحمد لله بعدها بنص ساعة. وكانوا سلبيين جداً. لا معاهم أدوات تساعد، ولا معاهم دكتور من أساسو. وكمان مفيش حد منهم عنده أي فكرة عن كيفية التعامل مع الحادثة. بالإضافة لإنهم كانوا بيتفرجوا علينا وواخدين الموضوع باستخفاف. لولا إن الموضوع مش مستحمل، كنت إتخانقت معاهم. بعد 10 دقايق وصلت عربية إسعاف تانية أحدث من الأولى. بس مفيهاش دكتور برضو، ولا فيها أي تجهيزات طبية. مجرد النقالة. والحاجة الوحيدة اللي عملوها إنهم شالوا الناس اللي طلعناهم برة العربية وحطوهم في عربيات الإسعاف

لما حسينا إن مهمتنا خلصت خلاص، وإن الناس الموجودة هتقدر تكمل الشغل، وإننا مفيش في إدينا حاجة نعملها تاني، قررنا ننسحب ونسيبهم يطلعو الراجل اللي فاضل في العربية، وقبل منمشي خدت كم صورة عشان أبقى أحطها مع الموضوع. الموضوع انتهى. ومطلعتش منو غير بحاجة واحدة بس: إذا كان الإسعاف المكلف بإنقاذ أرواح الناس بالسلبية دي، يبقى إيه المتوقع من بقية الناس. لما الإسعاف يوصل بعد نص ساعة ومن غير دكتور ولا تجهيزات يبقى إيه لازمتو إنو يبقى فيه إسعاف في مصر من أساسو. عموماً يعني أسيبكم مع الصور

عربية الأسعاف الأولى بمجرد وصولها. وقفت عالناحية التانية والراجل بيشاور عقلو ينزل ولا لأ 

16062007(007)

العربية من ورا، وركزت فيها عشان أجيب الرقم

 16062007(009)

محاولات إخراج سواق العربية

16062007(010)

استخدمنا الحبل عشان نربطو في التابلوه ونرفعو بيه عن رجل الراجل

16062007(005)

رجل الأسعاف بيحقق مع واحد من المصابين

16062007(011)

عربية الإسعاف التانية وقفت بعيد وكأن الموضوع ميخصهاش 

16062007(012)

عجبتني أوي كلمة الرعاية العاجلة اللي مكتوبة قدام. فعلاً عاجلة

16062007(013)

المصاب الأول وهوة بيتنقل لعربية الإسعاف 

16062007(014)

المصاب التاني والتالت قعدوهم على جمب عشان المكان مش مكفي

16062007(015)

إزاز العربية مرمي عالأرض 

16062007(022)

السواق وهوة محشور تحت، والناس محتارة تطلعو إزاي 

16062007(023)

وش العربية وباين عليه أثر الحادثة 

16062007(031)

 

وبعد الغم ده. أسيبكم مع شوية صور خدتها وإحنا طالعين كوبري السلام فوق قناة السويس بعد الحادثة

بعد عبور البوابة الرئيسية للكوبري

16062007(048)

متجهين لأعلى نقطة في الكوبري

 16062007(049)

من على ارتفاع 75 متر فوق قناة السويس

16062007(051)

About these ads

June 19, 2007 - Posted by | سياسة ووجع دماغ

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: