عمرو زكي يتعرض للضرب

 قريت في جريدة المصري اليوم خبر عن تعرض نجم الزمالك ومنتخب مصر عمرو زكي للاعتداء من جماهير الأهلي. الخبر بيقول إن مشجعين شايلين أعلام الأهلي كانوا متربصين بعمرو زكي بعد خروجه من الاستاد، في نهاية حفل تسليم الكأس والميداليات. واعتدو عليه داخل عربيته، مما أدى لإصابة في ذراعه وكسر زجاج العربية وكسر تليفونه المحمول. لحد هنا الخبر انتهى، بس تعالو نحللو

الشيء الملاحظ إن الخبر جرى التكتم عليه بصورة غريبة جداً، والجريدة الوحيدة اللي نشرتو هيا جريدة المصري اليوم، ونشرتو في زاوية صغيرة جداً. في المقابل عايزكو تتخيلوا لو إن الموقف ده حصل مع لاعب في الأهلي زي أبو تريكة ولا متعب، تخيلوا إيه كان هيحصل. كان الموضوع جرى تغطيتو بصورة فجة ومملة في كل وسائل الإعلام. مع استغلال الحادث في تشويه صورة جماهير الزمالك. والتأكيد على إن نادي الأهلي هوه نادي المباديء والأخلاق. وإن جمهوره مستحيل يعمل زي جمهور الزمالك

ممكن يطلعلنا واحد عبيط ويقول واش جاب عمرو زكي لابو تريكة. وهيرفض في عقله الباطن إنو يقارن بين الموقف بتاع عمرو زكي والموقف بتاع تريكة لو حصل. ده بسبب إن جمهور الأهلي مش متخيل إن فيه نجوم غير نجومه. وأي حد تاني هوه نجم، بس أول لما يلبس فانلة تانية مش حمرا، يتحول بقدرة قادر لشخص عادي

عموماً يعني. مفيش زملكاوي زعلان من الموقف ده. لإن نسبة كبيرة من جمهور الأهلي عودتنا على الأفعال اللي زي دي. وشيء طبيعي إن نجم محترم وكبير زي عمرو زكي مش هيحط في دماغه حادثة تافهة زي دي من مشجعين تافهين. ومش هيصعد الموضوع، لإننا كلنا عارفين ومتأكدين إن الإعلام في بلدنا كلو أحمر. ومهما عملنا الموضوع هيتغطى عليه

الكلمتين دولا معمولين عشان سبب واحد بس. عشان كل لما نقول للأهلاوية إن الإعلام أحمر يقولوا إزاي؟ وإيه الدليل؟ الدليل أهو. ومن وقت للتاني هجيب أمثلة تثبت إن الإعلام في مصر متحيز للأهلي. الغريب بقى إن فيه ناس بتشجع الأهلي شايفين إن ده أمر طبيعي وعادي. وده لوحدو دليل على تخلف الجماهير دي. لإن المنطق بيقول إن فيه مهن معينة ومنها الصحافة والإعلام، لازم اللي بيقوموا عليها يبقوا محايدين، ومهما كانت انتماءاتهم لازم يحافظوا على حيادهم. بس هنعمل إيه جهل بقى

الأهلي وبرشلونة، كل واحد يعرف حجمه كويس

الحقيقة المؤسفة التي جاء وقت أن نقولها بصراحة هي حقيقة قالها الراحل العظيم صالح سليم من قبل، وهي – الأهلي أعور وسط عميان – وهذه هي الحقيقة التي قالها صالح سليم، وهو يريد أن يفهمها الجميع ليجعل الجميع يلعب كرة قدم حقيقية، ولكننا لم نفهمها واكتفينا بأن نقول أن الأهلي انهزم بالأربعة من برشلونة. من الآخر، كل واحد يعرف حجمه كويس

أسوأ فريق في العالم

كل الفرق نفسها تاخد لقب أفضل فريق في العالم. وده كان بيتحدد عن طريق بطل بطولة دوري أبطال أوربا، وبعد كده بقى عن طريق بطولة كاس العالم للأندية “إنتركونتننتال” واللي كانت بتجمع بين بطلي أوربا وأمريكا الجنوبية. وبعد كده بقت بتتحدد عن طريق كأس العالم للأندية

بس محدش فكر يعرف مين أسوأ فريق في العالم. ومن خلال البحث في أكتر من 200 دوري وكاس محلي، تم التوصل لأسوأ فريق في العالم. ونال اللقب ده فريق بلغاري إسمه تشيرنوموريتس بورجاس عن طريق الأرقام والاحصاءات

الفريق ده حقق أسوأ نتايج ممكنة لأي فريق في العالم في الموسم ده. مثلاً، الفريق لعب في الدوري البرتغالي 23 مباراة لحد دلوقتي، مفازش في ولا مباراة، واتعادل تعادل واحد بدون أهداف، واتغلب ال 22 ماتش الباقيين، والرقم ده معرض للزيادة في بقية الموسم

المشكلة مش بس في الهزائم، المشكلة في النتائج التقيلة، بحيث إنه خسر بنتيجة 3-صفر مرتين، وبنتيجة 4-1 مرتين، وبنتيجة 4-صفر مرة واحدة، وبنتيجة 5-1 مرة واحدة، وخسر بنتيجة 6-صفر ثلاث مرات، وخسر 7-صفر مرة واحدة، و 8-صفر مرة واحدة، و 10-صفر مرة واحدة، وأخيرا خسر 11-صفر في المرحلة الـ23 من ليتيكس لوفيتش، وهو الفريق اللي اتعادل معه في الدور الأول

الهزائم الكتيرة دي خلت شباكه تهتز 93 مرة في 23 مباراة بس، وبالتالي فهو أضعف دفاع في العالم، ومسجلش غير 7 أهداف بس على مدار البطولة. ومكتفاش بالهزايم بس، وإنما مراحش يلعب مبارتين من مبارياته. والظاهر إنه فضل إنه يتحسب مغلوب 3-صفر للانسحاب أحسن من إنه يتغلب بنتيجة أكبر. لكن الاتحاد البلغاري خصم منه 3 نقاط كمان علشان استهتاره، وبالتالي فقد النقطة الوحيدة اللي كان جابها من التعادل، وبقى مجموع نقاطه سالب نقطتين، وأقصى طموح ليه إنه يوصل لصفر

أما في كأس بلغاريا، فهوه خرج من أول مباراة، وملعبش بعد كده غير في الدوري. الغريب إن الفريق ده له مشجعين يقتربوا من 10 آلاف مشجع. بس أنا متأكد إن كلهم عندهم الضغط والسكر يا إما مجانين. فعلاً أسوأ فريق في العالم

هنري ميشيل، والحاقدين

اتعاقد الزمالك أخيراً وبصورة نهائية مع المدرب العالمي هنري ميشيل بعد فترة طويلة من الشد والجذب. وهياخد كمرتب شهري 50 ألف دولار ويستمر التعاقد سنتين لحد يونيو 2009

يعتبر هنري ميشيل واحد من أبرز مدربين العالم، ويعتبر أكتر مدرب شارك في بطولة كأس العالم بعد المدرب الصربي الشهير بورا ميلوتينوفيتش والبرازيلي الأسطورة كارلوس ألبرتو باريرا، لإنه شارك في أربع دورات لبطولة كأس العالم كمدير فني. والبداية كانت مع منتخب فرنسا ووصل بيه للمركز الثالث في مكسيكو عام 1986. وبرضو قاد المنتخب الأوليمبي الفرنسي إلى ذهبية دورة الألعاب الأوليمبية في لوس أنجلوس سنة 1984

ودرب هنري ميشيل منتخبات أفريقية كتيرة ووصل بيها لإنجازات كبيرة، فدرب منتخبات الكاميرون والمغرب والإمارات وتونس وأخيراً منتخب كوت ديفوار. ومكتفاش بتدريب المنتخبات بس، كمان درب على مستوى الأندية، درب أشهر وأكبر الأندية الأوربية والفرنسية. ومنهم نادي نانت الفرنسي العريق، ونادي باريس سان جيرمان الشهير، وفي اليونان كمان. وعلى المستوى العربي والأفريقي درب في الإمارات، وفي السعودية مع نادي النصر، وفي المغرب مع نادي الرجاء البيضاوي

وبيواجه هنري ميشيل حرب ضروسة من آلة الإعلام الحمراء لتشويه صورته وإحباط الجماهير البيضاء، ملقوش حاجة يقولوها غير روايات هابطة زي إنه مثلاً بيشرب الخمر، وكأن مانويل جوزيه مدرب الأهلي وكل الأجانب بيشربوا  ميه معدنية بس؟! ونسبوا الكلام ده للكابتن الخلوق محمود سعد، اللي مقالوش أساساً ونفى الكلام ده كزا مرة. بس الآلة الإعلامية الحمراء ملقتش حاجة تدافع بيها عن مدربهم “أبو دراع” المشهور بأخلاقه السيئة، فحاولوا إنهم يتكلموا عن الجانب الأخلاقي لميشيل، لكنهم مقدروش. فاتحولوا لطريقة اللعب اللي بيلعب بها ميشيل 4-4-2، بس ميشيل مبيستخدم الطريقة دي من الأساس على أرض الواقع للي بيتابع مباريات الزمالك كويس، فالزمالك وكل الأندية المصرية بيلعبوا بالطريقة المعتادة 3-5-2 بوجود عبدالواحد السيد أو عبدالمنصف في المرمى وأمامه ليبرو وائل القباني ومساكين اثنين وسام العابدي ويامن بن ذكري على سبيل المثال وظهيري جنب أحمد غانم سلطان وطارق السيد، وفي الوسط علاء عبدالغني وأحمد عبدالرءوف، وفي الهجوم حازم إمام وعمرو زكي ومصطفى جعفر، هذه هى طريقة اللعب المعتادة لنادي الزمالك وكل الأندية المصرية عامة. كل ما فعله ميشيل هو تقدم وائل القباني من خلف المساكين ليكون ليبرو متقدم أمامهم وأحياناً يعود خلفهم إذا تطلب الأمر ذلك، يعني مفيش جديد في طريقة اللعب اللي بيلعب بها الزمالك دلوقتي، وحتى لو أراد ميشيل تطبيق طريقة لعب جديدة فمفيش مشكلة ، لإن طريقة اللعب 3-5-2 اللي طالعين بيها السما مفرقتش مع الزمالك في الموسمين اللي فاتوا، سيبونا بقى نجرب طريقة جديدة

هنري ميشيل جاتله عروض تدريبية كتيرة لتدريب منتخبات زي ليبيا والسنغال، وبمرتبات أعلى. ولكنه فضل تدريب البلانكو الأبيض. وكان هنري ميشيل قد توج مشواره التدريبي العريق كأفضل ما يكون بدخوله ضمن أفضل 11 مدرب في العالم في تصنيف الاتحاد الدولي للإحصاء والتصنيف والمعتمد رسمياً من الاتحاد الدولي لكرة القدم الفيفا. رغم محاولة الإعلام الأحمر التقليل من شأن المدرب العظيم ده

تمنياتنا له بالتوفيق مع نادي الزمالك المصري. نادي القرن العشرين الحقيقي

الزمالك، وحلم البطولة العربية

الأهلي هو من يدير كرة القدم في مصر

جاء قرار إعتذار اتحاد الكرة عن عدم خوض المباراة الودية أمام منتخب الكويت يوم الاثنين المقبل بناء على رغبة مسئولي النادي الأهلي ليضع الكثير من علامات الاستفهام حول هوية من يدير كرة القدم في مصر، وهل هو اتحاد الكرة أم النادي الأهلي

فاتحاد الكرة اتفق مع نظيره الكويتي على إقامة المباراة في هذا الموعد منذ فترة طويلة جدا، وكان يعلم جيدا وقتها مواعيد مباريات الأندية المصرية في البطولتين الأفريقية والعربية واتخذ قرارا باعفاء لاعبي الزمالك من المشاركة في المباراة بسبب تعارض موعد إقامتها مع موعد مباريات دوري أبطال العرب، بينما قرر ضم لاعبي الأهلي والإسماعيلي لابتعاد موعد المباراة عن موعد مباريات بطولتي أفريقيا للأندية، إذ أن المباراة ستقام يوم الاثنين بينما تقام مباريات بطولتي أفريقيا أيام الجمعة والسبت والأحد، أي ان هناك فاصل زمني خمسة أيام على أقل تقدير

وبالفعل قام اتحاد الكرة بابلاغ الأندية المصرية بما فيهم الأهلي بموعد مباراة مصر مع الكويت حتى يكون الجميع على علم بها، كما أنه قام بتوقيع عقد المباراة مع نظيره الكويتي واشتمل العقد على شرط جزائي قدره مائة ألف دولار أمريكي لمن يعتذر عن عدم أداء المباراة أي ما يزيد عن نصف مليون جنيه مصري

والغريب بعد ذلك أن مسئولي الأهلي رغم علمهم بكافة الظروف قرروا إقامة مباراة برشلونة الودية الإستعراضية يوم 24 أبريل، ثم قرروا بعد ذلك إختيار يوم 20 أبريل لإقامة مباراة العودة أمام صن داونز رغم أنه كان بامكانهم إختيار أحد يومي 21 أو 22 أبريل وذلك حتى يتيحوا وقتا كافيا بين مباراتي صن داونز وبرشلونة، وتغاضوا تماما عن التفكير في مباراة مصر والكويت، وبعد إختيارهم لموعد مباراة صن داونز بكامل إرادتهم يوم 20 بدأوا في الضغط على مسئولي اتحاد الكرة لالغاء مباراة الكويت بحجة ضيق الوقت بينها وبين مباراة صن داونز

الأكثر غرابة من ذلك أن اتحاد الكرة في بداية الأمر أكد أنه لن يؤجل مباراة الكويت نظرا لأهميتها للمنتخب الوطني، ولتمسك الجهاز الفني للمنتخب بها، كما خرجت تصريحات عنترية من مسئولي الاتحاد أن المباراة سوف تقام في موعدها وبمشاركة لاعبي الأهلي والاسماعيلي، إلا أنه وبعد ضغوط من مسئولي الأهلي رضخ اتحاد الكرة لجميع مطالبهم ليقرر الاعتذار عن عدم أداء مباراة الكويت ضاربا بعرض الحائط العقد الموقع مع الجانب الكويتي، ليتحمل اتحاد الكرة مبلغ مائة ألف دولار هي قيمة الغرامة، والأهم من ذلك أن صورة اتحاد الكرة إهتزت بشدة في الأقطار العربية جميعا بعد عدم التزامه بالاتفاق خاصة أن الجانب الكويتي كان قد أتم جميع الترتيبات وقام بطبع تذاكر المباراة وحجز تذاكر الطيران والفندق، ونحمد الله أن هذه المباراة لم تكن مع منتخب أوروبي والا كانت صورتنا إهتزت أمام العالم أجمع، ولكن مش مشكلة .. كله يهون من أجل عيون الأهلي

وإذا عقدنا مقارنة بين مباراتي مصر مع الكويت والأهلي مع برشلونة سنجد أن المباراة الأولى أهم كثيرا من الناحية الفنية، فالمنتخب المصري يستمر لفترات طويلة بدون أي تجمع أو مباريات، ومن المهم أن يتاح له تجمع واحد شهريا على الأقل تقام فيه مباراة ودية حتى يحدث الانسجام بين لاعبي المنتخب، وأيضا يتم إكتشاف لاعبين دوليين جدد يفيدون المنتخب بعد ذلك على المدى الطويل، أما الأهلي فيلعب مباريات عديدة محليا وأفريقيا وعالميا ولن تفيده مباراة برشلونة كثيرا من الناحية الفنية بل هي مجرد مباراة إستعراضية لغرض الاحتفال والمنظرة فقط. الغريب بعد ذلك أن مسئولي الأهلي رغم علمهم بكافة الظروف قرروا إقامة مباراة برشلونة الودية الإستعراضية يوم 24 أبريل

أما من الناحية المادية، فمباراة برشلونة ستسبب ضررا للأهلي، حيث سيقوم بدفع ما يعادل 12 مليون جنيه مصري لخزينة برشلونة لإقامة هذه المباراة، وللأسف فقد زاد عليهم الآن نصف مليون جنيه جديدة سيتكفل بها اتحاد الكرة لنظيره الكويتي بسبب الشرط الجزائي وهو ما يدخل بشدة تحت بند إهدار المال العام

وحقيقة، أنا لا أجد أي داعي للاعتذار عن عدم أداء مباراة الكويت، وكان يمكن إقامتها يوم الاثنين ثم يلعب الأهلي مباراته أمام صن داونز يوم الجمعة لاسيما وأنها مباراة محسومة للأهلي بعد التعادل 2-2 في لقاء الذهاب، ثم يؤدي بعد ذلك الأهلي مباراة برشلونة يوم الثلاثاء، وحتى لا يردد البعض أن ذلك سيسبب إرهاقا للاعبي الأهلي أود ان أختتم الموضوع بثلاث ملحوظات بسيطة عن تعاقب المباريات في البلاد المحترمة الأخرى، وسأضرب ثلاثة امثلة إثنين منهما أوروبيين أحدهما لبرشلونة نفسه والثالث عربي لعلنا نتعلم من هؤلاء شيئا جديدا

أولا: برشلونة نفسه الذي سيلتقي مع الأهلي يوم الثلاثاء 24 أبريل سيلعب يوم الأربعاء 18 أبريل أمام خيتافي في الدور قبل النهائي لكأس أسبانيا ثم سيلعب يوم الأحد 22 أبريل أمام فياريال في الدوري أي قبل 48 ساعة فقط من مباراة الأهلي علما بأنه سيكون أمامه رحلة طيران طويلة من إسبانيا إلى مصر يوم الاثنين أي أنه سيصل القاهرة قبل المباراة بيوم واحد وربما لن يجري أي تدريب قبل المباراة، بينما الأهلي في حالة عدم إلغاء مباراة الكويت كان سيلعب يوم الاثنين ثم يلعب يوم الجمعة بالقاهرة أي أنه يمتلك يومين راحة أكثر من برشلونة سواء في مباراة الكويت أو في مباراة صن داونز التي ستقام بالقاهرة نفس مكان إقامة مباراة برشلونة

ثانيا: توتنام هوتسبر الانجليزي لعب مباراة أمام ريدينج في الدوري الإنجليزي يوم الأحد 1 أبريل ثم سافر إلى إسبانيا والتقى مع سيفيليا يوم الخميس 5 أبريل في كأس الاتحاد الأوروبي وانتهت المباراة في العاشرة مساء، ثم سافر إلى إنجلترا مرة أخرى ولعب مع تشيلسي في الثانية عشر إلا ربع ظهر السبت 7 أبريل أي بعد 36 ساعة فقط من مباراة سيفيليا وهو ما يعادل يوم ونصف تخللهم رحلة سفر، علما بأن توتنام يضم لاعبين مصريين، أي أن لاعبيه ليسوا من كوكب آخر

ثالثا: أهلي جدة السعودي لعب مع الزمالك يوم الثلاثاء 13 مارس في دوري أبطال العرب وبعدها بـ48 ساعة فقط لعب مع القادسية في الدوري السعودي يوم الخميس 15 مارس وبعد ذلك بـ72 ساعة لعب لقاء مصيري مع الهلال في ذهاب الدور قبل النهائي لكأس ولي العهد يوم الأحد 18 مارس، أي أنه لعب 3 مباريات في خمسة أيام، والمثير أنه تعادل مع الزمالك وفاز في المباراتين الأخرتين على القادسية والهلال، ولم يطلب مسئولو الأهلي التأجيل ولم يشتكوا اتحاد الكرة السعودي ولم يقولوا إنه منحاز للهلال أو الاتحاد، وذلك لأن اتحاد الكرة هناك أقوى من جميع الأندية حتى الأهلي نفسه. لكن اتحاد عن اتحاد يفرق.. وأهلي عن أهلي يفرق

خلاصة الكلام: حد يلاقي دلع وميدلعش

أبوتريكة أرخص لاعب في مصر

 

اختلف الكثيرون حول قيمة عقد محمد أبوتريكة نجم النادي الأهلي الأول. هناك من راح يؤكد أن أحسن لاعب في بطولة دوري الأبطال الأفريقي يحصل علي مبلغ ‏900‏ ألف جنيه سنويا‏. وهناك من يراهن علي أن قيمة العقد وصلت للمليون جنيه‏. وردد آخرون أن المبلغ يزيد ويصل لمليون وربع المليون جنيه وربما أكثر

وبالتأكيد يستحق محمد أبوتريكة الكثير والكثير‏.‏ وأن يكون الأفضل بين لاعبي الدوري المصري فهو صانع أفراح جماهير الكرة المصرية بصفة عامة وجماهير الفانلة الحمراء بصفة خاصة‏. حسم بأهدافه وموهبته أكثر من لقب وبطولة سواء للنادي الأهلي أو لمنتخب مصر‏

ولكن المفاجأة فيما تقوله الأوراق الرسمية ـ مفاجأة من النوع الثقيل ـ محمد أبوتريكة ليس أغلي اللاعبين ولا أكبرهم من ناحية قيمة العقود‏. وتحديدا في هذا الموسم ـ بل إن الورقة الرابحة للبرتغالي مانويل جوزيه وحسن شحاته يعد من أقل اللاعبين في قيمة العقد‏. ولا نبالغ إذا قلنا إنه علي مسئولية الأوراق الرسمية والعقود المسجلة والموثقة في اتحاد الكرة ومنطقة القاهرة يعد من أرخص اللاعبين‏.‏ وهناك لاعبون في انبي والإسماعيلي والاتحاد السكندري يحصلون علي عقود أكبر منه‏

نعم هذه الحقيقة أو القنبلة التي تفجرها الأوراق الرسمية والتي تثير العديد من علامات الاستفهام والدهشة والحيرة وتحتاج للتفسير في نفس الوقت‏

محمد أبوتريكة وقع للنادي الأهلي علي عقود مرتين‏. المرة الأولي عندما انضم له من صفوف نادي الترسانة، والمرة الثانية في هذا الموسم، وقبل أن ينتهي عقده القديم مع القلعة الحمراء‏. العقد القديم لمحمد أبوتريكة تاريخه ‏20‏ يناير‏2004‏ ويمتد لمدة أربع سنوات ونصف السنة وبالتحديد بداية من يناير موسم ‏2004/2003‏ وينتهي بنهاية موسم ‏2008/2007‏ وذلك مقابل مبلغ مليون وخمسمائة وخمسة وعشرين ألف جنيه‏

والعقد الجديد من الصدف يبدأ أيضا في شهر يناير.‏ وبالتحديد يناير‏2007‏ لموسم ‏2007/2006‏ ومدة هذا العقد ثلاثة مواسم ونصف الموسم. أي ينتهي العقد موسم ‏2010/2009. وحسب الأوراق الرسمية وكما جاء في البند الثاني‏ (‏مقابل العقد‏)‏ اتفق الطرفان علي أن يكون مقابل التعاقد مليونا وستمائة ألف جنيه في المواسم الثلاثة والنصف. القراءة في عقد محمد أبوتريكة مع الأهلي والذي تم توثيقه في منطقة القاهرة مقابل رسوم قدرها ‏16‏ ألف جنيه وفي اتحاد الكرة مقابل رسوم ‏3500‏ جنيه تظهر أكثر من مفاجأة وعلامة استفهام أيضا

المفاجأة الأولي في العقد هي قيمة الموسم الأول وبمعني أدق وأكثر تحديدا قيمة نصف الموسم علي أساس أن العقد الجديد يبدأ من يناير وبالتالي حسابيا فهو نصف موسم. في الأوراق الرسمية يحصل محمد أبوتريكة علي مبلغ‏ 120‏ ألف جنيه. ينال منها مبلغ ‏30‏ ألف جنيه كمقدم للعقد تسدد في ‏30‏ يناير. وهناك مبلغ 5 آلاف جنيه أقساطا شهرية من نهاية فبراير ولمدة ستة أشهر أي حتى نهاية شهر يوليو المقبل. وال ‏50%‏ المتبقية من قيمة العقد السنوي توزع علي اللاعب طبقا لمشاركاته وطبقا للائحة المالية في النادي الأهلي‏، ولأنه لم يشارك كثيرا مع الأهلي للاصابة يمكن أن يقل العقد. وربما هذا المبلغ هو ما يحصل عليه محمد أبوتريكة رسميا من النادي الأهلي. بجانب أرقام أخري من رجال الأعمال التابعين للقلعة الحمراء الذين يحرصون علي تقديم ترضية للاعبين بعيدا عن الأوراق الرسمية‏. أو ربما هناك أشياء أخري. ولكن يبقي الرقم الذي يناله محمد أبوتريكة رسميا من أقل العقود والأرقام التي يحصل عليها اللاعبون في مصر. وهناك لاعبون في أندية القاع ولن نقول الأندية التابعة لشركات يحصلون علي مبلغ أكبر من ‏120‏ ألف جنيه في نصف الموسم أو حتي مبلغ ربع مليون جنيه في الموسم الواحد

المفاجأة الثانية والأكبر هي أن قيمة عقد أبوتريكة عن هذا الموسم في العقد الجديد تعد أقل من قيمة عقده عن هذا الموسم في العقد القديم كما تقول الأوراق الرسمية. العقد القديم لأبوتريكة كما قلنا يمتد لمدة أربعة مواسم ونصف الموسم والذي نال عنه مبلغ ‏75‏ ألف جنيه‏. وفي موسم ‏2005/2004‏ حصل علي مبلغ ثلاثمائة وخمسة وعشرين ألف جنيه. وكانت قيمة العقد تزيد سنويا بمقدار ‏25‏ ألف جنيه. والمفروض أن يحصل محمد أبوتريكة في هذا الموسم علي مبلغ ‏375‏ ألف جنيه. وفي الأخير علي مبلغ ‏400‏ ألف جنيه. وحتي إذا قسمنا مبلغ هذا الموسم في العقد القديم‏ (375‏ ألف جنيه‏)‏ سيكون أكبر مما يناله في نصف موسم العقد الجديد هو ‏120‏ ألف جنيه فهل يتراجع أبوتريكة أم يزيد. والعقد القديم لم يكن موجودا به شرط توزيع ‏50%‏ من قيمة العقد علي نسبة المشاركات في المباريات

محمد أبوتريكة في أكثر من حديث صحفي أكد أنه وقع للنادي الأهلي علي بياض حبا في النادي وجماهير الفانلة الحمراء، فهل يتحدث أبوتريكة ويذكر الرقم الحقيقي في عقده‏. وهل هو المسجل في الأوراق الرسمية أم لا. الحقيقة التي نفجرها هي أن أبوتريكة علي الأوراق الرسمية يعد من أرخص اللاعبين في مصر. وهناك عقود للاعبي الأهلي علي الورق أيضا أكبر منه مثل عقد الحضري حارس المرمي‏. أما في الزمالك فالأرقام أكبر بكثير‏

إضافة من عندي بقى. الخبر ده منقول من موقع بوابة مكتوب على الإنترنت. والخبر مدعم بوثائق رسمية. عشان الناس اللي بتشكك في أي حاجة. وبمحاولة لإيجاد تفسير  للموضوع ده. مفيش غير تفسير واحد. أبو تريكه بياخد مبلغ كبير جدا. بس متقسم لجزئين. جزء رسمي. وجزء تاني غير رسمي من رجال الأعمال. ليه كده؟ عشان الضرايب. الضرايب بتفرض على الحاجات الموثقة رسمياً بس. أنا مستبعدش كده لإن رجال الأعمال اللي بيدعموا الأهلي ونسبة كبيرة منهم اعضاء في مجلس إدارته. معروفين بالإسم. ومعروف أصل ثرواتهم. وتاريخهم المالي مش محتاج تعليق، وكمان علاقتهم بالبنوك معروفة. نجيب ساويرس. أحمد عز. احمد بهجت. وغيرهم كتير

عمرو زكي ينفي رغبته في الرحيل عن الزمالك

أكد عمرو زكي مهاجم الزمالك سعادته باللعب في صفوف الفريق الأبيض، وعدم وجود نية ترك النادي، نافيا التقارير الصحفية التي تناولت رغبته في الرحيل عن صفوف الفريق، وقال عمرو زكي في تصريحات خاصة لـ موقع “فالجول” يوم الجمعة: أنا سعيد بوجودي في نادي الزمالك والأخبار عن رحيلي عن الفريق كلام عار من الصحة. وأضاف: هذا الكلام غير منطقي ولايتفوه به عاقل .. إذ يحق للنادي الاحتفاظ بي حتى إذا أعلنت رغبتي بالرحيل، وأتمنى معرفة من يطلق مثل هذه الشائعات على لساني

وكانت تقارير صحفية قد رجحت رحيل نجم الزمالك عن الفريق نهاية الموسم الجاري، بسبب صعوبة اللعب في النادي الأبيض، وعدم الإستقرار الذي يسود أرجاء النادي. ونفى زكي غضبه من إداراة النادي بسبب عدم الموافقة على عروض الإحتراف التي تلقاها قائلا: كنت اتمنى أن توافق إداراة النادي على إحترافي، ولكن الآن أنا ملتزم بتعاقدي مع الزمالك

وكان نادي شيفيلد الإنجليزي قد قدم عرضاً إلى الزمالك لضم زكي مقابل مليوني جنيه إسترليني حسب اللاعب، إلا أن النادي الأبيض رفض حتى بعد زيادة المقابل إلى ثلاثة ملايين جنيه إسترليني، وأوضح زكي أنه أصبح قريبا من العودة للتدريات، إذ أنه سيبدأ التدريبات التأهيلية من دون كرة بعد اسبوع

يذكر أن زكي قد تعرض للإصابة بكسر في الأنف والحاجز الأنفي بعد تدخل عنيف من التونسي خالد بدرة مدافع فريق أهلي جدة السعودي في المرحلة الأخيرة من مباريات المجموعة الأولى في دور الثمانية من دوري أبطال العرب

الكلام اللي فوق ده بنقوله رداَ على الإشاعات والتصريحات اللي طلعلنا بيها موقع يلا كورة، ومعاه موقع مصراوي، بخصوص عمرو زكي. مش عارف الناس دي بتجيب الكلام ده منين. وإزاي موقع محترم زي مصراوي وزي يلا كورة يعمل كدة. ومرة بعد مرة. حاجة تفرس بجد. ماتسيبوا الزمالك في حاله بقى. يعني لو فيه مشاكل تقوموا مكبريها. ولو مفيش مشاكل تقومو تألفوا مشاكل. ولا مش عاجبكو الاستقرار الحالي في نادي الزمالك، ومفروسين من عمرو زكي بالذات ليه، نفسي أعرف

الخبر ده مكنتش هعلق عليه لو كان خبر صغير. اللي خلاني أعلق عليه وأجيب الرد بتاع عمرو زكي، إن موقع يلا كورة وموقع مصراوي جايبين الخبر من ضمن العناوين الرئيسية وجايبينه كانفراد كمان، يعني الموضع باين عليه أوي إنه متعمد، ومفضلش غير إننا نقول، حسبنا الله ونعم الوكيل فيكو

كأس السوبر الأهلاوي، والإعلام الأحمر – الجزء الثاني

حبيت أبدأ الجزء التاني من مقالي بصورة للكأس، بعد فوز الأهلي، وبنقول مبروك للأهلي مرة تانية

نرجع لموضوعنا بخصوص الإعلام الأهلاوي. كلنا اتفاجئنا بعد الماتش بالإعلام الأحمر، بينشر على الملأ إن الأهلي خد اللقب 3 مرات، وإنه بكده احتفظ بالكأس. وده كله كدب في كدب. الأهلي خد كأس السوبر 3 مرات. لكنه ماحتفظش بالكاس. بقول لواحد أهلاوي صاحبي عالحكاية دي. قام قايللي، هوة مين قال كده؟ مين قال إننا احتفظنا بالكاس. أرد عليه وأقوله، الكلام ده قاله “العامري فاروق” عضو مجلس إدارة النادي الأحمر في برنامج “شوبير اليوم” ونفس الكلام قاله “أحمد شوبير”، ده غير كتيبة الإعلاميين الحمر، اللي قالوا الكلام ده في الصحف المصرية تاني يوم. وخصوصاً في جريدة الأهرام، اللي بقت حمرا أوي. وحكاية حمار الأهرام دي موضوع تاني، هنبقى نتكلم فيه بعدين. ونفس الحكاية في المواقع الأهلاوية على الإنترنت. كله قال إن الأهلي احتفظ بالكأس. دي لينك جبتها بصعوبة من موقع جماهير النادي الأهلي

http://www.el-ahly.com/Sitemanager/templates/news.aspx?articleid=4740&zoneid=26

واللي يفتح الموضوع هيلاقيهم كاتبين : “لقد أثبت أبطال الأهلي اليوم .. أنهم أسياد كرة القدم الأفريقية .. فهو البطل .. وبطل كأس السوبر .. الذي فاز بها للمرة الثالثة في تاريخه .. وبهذا يكون له الحق بالإحتفاظ بالكأس للأبد .. إذا فاز بالكأس مرة أخرى .. وبهذا يكون الأهلي عادل الرقم الوحيد .. الذي كان الزمالك .. الوصيف الأزلي للأهلي .. بتفوق به على بطل الأبطال

وهقوللكو ليه جبت اللينك دي بصعوبة. علشان أول لما الحقيقة ظهرت، والناس عرفت إن لوائح البطولة بتقول إن الأهلي مينطبقش عليه شروط الاحتفاظ بالكأس، على طول كل الإعلام الأحمر والمواقع الأهلاوية لحسوا كلامهم. وحاولوا يغطوا عليه بأخبار تانية، عشان ميتكشفش كدبهم. نفس الحكاية في الصحف المصرية اللي بقت معظمها حمرا. مفيش حد فكر مجرد تفكير إنه يعتذر عن الكلام الغير دقيق، والبطولة المزيفة اللي كانوا عايزين يضيفوها لسجل طويل عريض من البطولات المزيفة. طيب اعتذروا وقولوا معلش إحنا غلطنا. لأ شوف البجاحة كمان، بيقولوا إحنا مقلناش كده، إنتوا جبتوا الكلام ده منين، وإحنا مقلناش كده. يا عالم اتقوا ربنا

ودي لينكات تانية من موقع يلا كورة، اللي بيحاول إنه يبقى محايد، وإن كان الحمار -فتحه عالحاء -بتاعه باين قوي

http://www.yallakora.com/arabic/news/details.aspx?ID=15139

http://www.yallakora.com/arabic/news/details.aspx?ID=15138

هتلاقيهم كاتبين إن الأهلي احتفظ بكأس السوبر. وطبعا لما بانت الحقيقة محدش فكر يقول إنه غلطان

دلوقتي هقولكو على شرط الاحتفاظ بكأس السوبر. “سابق احتفاظ الزمالك بكأس هذه البطولة لفوزه بها ثلاث مرات آخرها عام 2003 ، حرم الأهلي من معادلة ذلك، وإن عادل عدد مرات الفوز الزملكاوية، لكنه يحتاج إلى فوز رابع لكي يحتفظ بالكأس الجديدة لأنه لم يفز بها سوى مرتين، بينما المرة الثالثة كانت خاصة بالكأس التي استقرت في ميت عقبة“. يعني بعد لما الكاس ياخدها نادي معين، لازم الفرقة التانية تاخد الكاس 3 مرات عشان تحتفظ بيه. الكاس الأولانية احتفظ بيها الزمالك. والمطلوب من الأهلي إنه ياخد الكأس 3 مرات بعد احتفاظ الزمالك بالكأس. ولحد دلوقتي الأهلي خدها مرتين سنة 2006 و 2007، والمرة بتاعة 2002 متتحسبش ضمن العدد المطلوب، لأن الزمالك خد البطولة اللي بعدها في 2003 واحتفظ بالكأس. يعني نبدأ نعد من جديد من بعد 2003. وده حسب تصريحات الإتحاد الأفريقي لكرة القدم الكاف

الزمالك فاز بالكأس 3 مرات أعوام 1994 و 1997 و 2003. ومن ضمنهم سنة 1994 بالفوز على الأهلي 1 – 0 وكان حارس مرمى الأهلي وقتها أحمد شوبير. الأهلي بقى فاز بيها 3 مرات برضو أعوام 2002 و 2006 و 2007. والملاحظة إن من ال 3 مرات دولا، مرتين كان الفوز عن طريق ضربات الجزاء. ونرجع نقول، الأهلي محتفظش بالكأس

النقطة الأخيرة في الموضوع ده، موضوع تحطيم الأهلي لرقم الزمالك القياسي في الفوز ببطولة السوبر. وده مش صحيح. كل اللي عمله الاهلي بعد الفوز الأخير هوة معادلة رقم الزمالك في الفوز. التحطيم معناه إنه يتخطى عدد مرات فوز الزمالك بالكأس. وطبعا كل الإعلام الأحمر، لا بيسمع ولا بيشوف، ومقفلين دماغهم على إن الاهلي حطم. تحطيم إيه وتكسير إيه

با أهلاوية، ده ولا تعصب ولا حاجة. ده لقب وإنتوا بتحاولوا تسرقوه مننا. لأن واحد من اللي بيكتبوا في الأهرام كان معترض على اعتراض الزمالك، وشايف إن ده تعصب. هوة الواحد لما يدافع عن حقه يبقى متعصب. بخصوص موضوع الاحتفاظ بالكأس، نفسي أعرف الإعلام الأهلاوي، وأعضاء مجلس الإدارة اللي قالوا المعلومة الغلط دي. يا ترى ده تضليل للرأي العام، ولا جهل بقوانين الكاف. الاتنين أسوأ من بعض

وأخيراً. مبروك عليكم الكأس. بس ياريت متقولوش كلام مش صح، وتضيفوا بطولة وهمية مش من حقكو

وأحب أقول: الكلام ده كله مش للأهلوية. وإحنا والله العظيم فرحانين ليكو. الكلام ده للإعلام الأحمر اللي إداكو معلومة غلط. الإعلام اللي غاوي تطبيل وتزمير للأهلي عالفاضي والمليان. ولما يغلط ميفكرش مجرد تفكير إنه ويعتذر. ومبروك الكأس مرة تالتة. انتهى

كأس السوبر الأهلاوي، والإعلام الأحمر – الجزء الاول

النهارده هتكلم عن بطولة السوبر اللي كانت بين النادي الأحمر المصري ونادي النجم الساحلي. ناس كتير تابعت الماتش ده، ومنهم أنا. وبالتأكيد محدش فينا كان متوقع مفاجآت بخصوص النتيجة. مش لإن الأهلي مستواه كويس، وإنما لأن النجم الساحلي أصلا مستواه مش جامد. وبصراحة يعني كده، عيب على الأهلي إنه ميعرفش يفوز عليهم إلا من خلال ضربات الجزاء.

بالنسبة للمباراة. كل الأهلاوية كانوا بيعلقوا على سوء أرضية الملعب، وعلى نقص الأكسجين. طبعا الكلام ده متاخد كوبي بيست من المواقع والإعلام الأهلاوي. لإني أراهن لو 1 في الألف من الاهلاوية كان عارف إن أثيوبيا مرتفعة عن سطح البحر، والأكسجين عندهم قليل. معرفوش يعني من الآخر غير قبل الماتش. سياسة القطيع بين قوسين. وبصراحة يعني اتمنيت إن الأهلي يفوز علشان ميقولوش اتغلبنا بسبب الأكسجين. وأنا متأكد إنهم لو اتغلبوا هيقولوا الأكسجين. وكأن بتوع النجم الساحلي مش بيعوزوا أكسجين هما كمان. لما قلت لواحد من الأهلاوية، سيبيكوا بقى من موضوع الأكسجين ده، لإن الظروف دي عليكو وعلى الفرقة التانية. ده يمكن إلأهلي هيستحمل عن بتوع تونس علشان الجو الملوث المهبب اللي إحنا عايشين فيه في مصر اللي مفيهوش أكسجين أساساً. لما قلتله كده، معجبوش الكلام. خلاص ياعم، بعد كده إبقوا خلو اللعيبة ياخدوا معاهم أنابيب أكسجين، لحسن يا حرام هيفرفروا من قلة الأكسجين

لما اتغلبوا من الإسماعيلي3 – 0 شوية قالوا الحكم، وشوية قالوا الإجهاد، بس محدش فيهم إعترف إن الاسماعيلي عمل مباراة من أحسن ما يكون، وإن الأهلي مكنش بيلعب أساسا، وربنا رحمه من فضيحة سداسية وسباعية. دايماً المبررات موجودة. إزاي نصدق إنكم اتغلبتم بسبب الإجهاد وكترة المباريات، وإنتو بسلامتكو فزتو الماتش اللي بعده بخمس أهداف عالمقاولين. يبقى فين الإحهاد والتعب دلوقتي. اعترفوا. إنتوا مكنتوش بتلعبوا الماتش ده كويس. ومن الآخر الاسماعيلي لعب ماتش جامد. محدش يزعل، عشان الشماعات اللي في دولاب الأهلي، واللي بتستخدم عالفاضي والمليان كترت اوي، ولازم نقول رأينا بقى.

نرجع للماتش، الأهلي فاز، وحمدت ربنا إنه فاز، علشان ميتحججوش بموضوع الأكسجين. وأنا عن نفسي كنت بشجع الأهلي. أولا لإنه بيلعب باسم مصر، وثانياً، إني مش بشجع النجم الساحلي، ومش بحب في فرق تونس غير الصفاقسي. الغريب، زي مالزملكاوي الكبير عماد أديب قال: “إن الأهلاوية بيفضلوا يبصوا على وشوا، ويشوفوا انفعالاته في الماتشات اللي بيلعبها الأهلي مع الفرق التانية”. وكأنهم متوقعينه يهيص لما يدخل في الأهلي جون، أو يزعل لو الأهلي فاز”. والحكاية دي بتحصل مع كل الزملكاوية. يا جماعه الموضوع بسيط. لما يكون الأهلي بيلعب مع فرق برة مصر. إحنا بنشجع الأهلي من واجب الوطنية. مش عارف بتبصولنا ليه، ولا اللي على راسه بطحة بيحسس عليها، وعايزيننا نعمل زي مبتعملو، وبلاش نفكركو بماتش القادسية، والأعلام اللي كانت مرفوعة فيه.

لحد كده خلاص إنتهى الجزء الأول، والأهلي فاز بالكأس، وألف مبروك عليه، واستنوني مع الجزء التاني. الكلام لسه كتير.