مدونة دواير

سهام الحق


 منح خاطفو الألمانيين ماريان غيب كراواس (61 عاما) المتزوجة من طبيب عراقي وابنها سنان كاظم (20 عاما) عشرة أيام إضافية لألمانيا كي تسحب قواتها من أفغانستان قبل إعدامهما، حسب ما أعلنه معهد مراقبة المواقع الإسلامية

ونشرت جماعة سهام الحق أيضا شريط فيديو تظهر فيه كراوس وهي تحث ألمانيا على تلبية مطالب الخاطفين

الخبر ده قريته في موقع الجزيرة نت. ومقدرش أقولكو كم الاستفزاز اللي حسيت بيه لما قريته. مش عارف جماعة سهام الحق دولا ناس عندهم مخ ولا تفكير أساساً. سهام حق مين وسهام زفت. وبعد كل الهباب اللي بيعملوه ده. يرجعوا يقولوا، صورة الإسلام وحشة ليه في العالم. ماهو من البلاوي اللي بتعملوها. شوهتوا صورة الإسلام، وشوهتوا صورة المقاومة بغبائكم

واحدة ست عندها 61 سنة. وأكرر تاني 61 سنة. إيه ذنبها إنها تتخطف وتتقتل بسب مواقف ألمانيا السياسية. وبعدين دي اتخطفت في العراق. إيش دخل العراق بقوات ألمانيا في أفغانستان. يا شوية حمير بطلوا تخلف بقى. إنتوا كده بتشوهوا صورة المقاومة. وعندهم حق بعد كده لما يقولوا علينا إرهابيين. لأ ودي كمان مش واحدة ألمانية جاية تحارب. دي واحدة مدنية. ومتجوزة من عراقي كمان

إبنها اللي عندو 20 سنة وهيا اللي عندها 61 سنة. إيه اللي كان هيجيبهم العراق في وسط الظروف الوحشة دي. غير عشان جوزها العراقي. ركز في الصورة، وبص في عنيهم. شوف الست دي عايزة تقول إيه. بص في نظرة إبنها وهتعرف أد إيه المعاناة اللي هما فيها. ولو كانوا فعلا بيقولوا لألمانيا تسحب قواتها، فده معناه إنهم ضد وجود القوات دي. يعني ناس بريئة ملهمش دخل في حاجة. ده لو كانوا بيقولوا الكلام ده من الغُلب اللي هما فيه

بص عالست اللي لبسوها الإيشارب غصباً عنها. ومش بعيد كمان يكونوا ضربوهم عشان يخلوهم يصلوا زينا. ومش بعيد يكونوا مشغلينلهم قرآن 24 ساعة في مكان نومهم. عشان ويا لعظمة الإسلام، أول لما يسمعوا القرآن مش هيقدروا يمسكوا نفسهم، وهينطقوا بالشهادة على طول. دي مش مبالغة. بس العقل المتخلف اللي يخطف إنسانة بريئة زي دي ويهدد بقتلها تحت إسم الإسلام. مش بعيد أبداً إنه يعمل أي حاجة. والمتخلفين اللي زي دولا وموجودين في بلدنا، دمروا مبدأ المواطنة جوة الشعب المصري. وبقى كل طرف مش قادر مجرد حتى إنه يحترم كيان الطرف الآخر، ويعامله كويس

قسماً بالله. لو اجتمع اليهود وأعوانهم على إنهم يشوهوا صورتنا، مش هييجي في دماغهم فكرة أكبر تخلف من اللي عملتو جماعة سهام الطين دي. نفسي أعرف الناس دي فاهمة الإسلام إزاي. نفسي أعرف إيه إحساسهم وهما بيقتلوا ست كبيرة زي دي. مسلمة، مسيحية، ولا حتى يهودية. مش روح. مش بشر. مش إنسان بيحس، ومن لحم ودم. فين حكم الإسلام اللي بيقولكو تعاملوا الناس بالهمجية والتخلف ده. ولا كل واحد بقى بيفهم الإسلام على هواه

حاجة تقرف والله اللي بيعملوه الناس دولا. ده شوية الهمج دولا باللي بيعملوه أخطر علينا من اليهود نفسهم. الإسلام علمنا لما نجاهد نجاهد بشرف، مش نخطف أبرياء

ياخي روحوا اتشطروا على قوات ألمانيا اللي موجودة في أفغانستان. بدل متيجوا العراق تتشطروا عالمدنيين الغلابة، وتشوهوا سمعة الإسلام بعمايلكو السودة دي

قال سهام الحق قال. سهام الهمجية والتخلف دي

April 3, 2007 - Posted by | إسلاميات, سياسة ووجع دماغ

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: